政情：白鴿黨又爆內訌 「大佬文化」逼走洪寶華
民主青年主席洪寶華前日宣布退出民主黨（白鴿黨），以及白鴿黨轄下獨立運作嘅民主青年，並辭任民青主席一職。佢大爆民青過往一直向外宣稱獨立運作，但實情係白鴿黨嘅中委會同財委會經常推翻民青常委會通過嘅項目，令佢對白鴿黨完全失望，直言「不再值得留戀」，仲話呢個就係外界一直形容嘅「大佬文化」。
實習營造獲年輕人支持假象
洪大鬧白鴿黨嘅「大佬文化」，講明「非我族類」就會「寸步難行」。佢提到每年民青為該黨舉辦嘅實習計劃，只係「讓實習充當布景板來營造黨獲年輕人支持的假象」，每當民青提出改善實習計劃嘅建議時，就會畀白鴿黨以黨內守則嚟加以限制，認為民青已失去應有嘅作用。