政情：岑智明後生被指似袁偉豪
今時今日出埠去旅行係好閒嘅事，年輕人都經常同朋友一齊去旅行。不過廿年前，搭飛機出外旅行就唔係咁普及，事關當時未有廉航，去玩一趟成本唔低。天文台台長岑智明尋日被朋友喺Facebook標記咗，睇真啲，原來係佢哋喺九十年代一齊去橫跨美國同加拿大嘅洛磯山脈嘅相，當時岑頭髮未白，有網友留言話佢好似「香港先生」出身嘅藝人袁偉豪咁靚仔喎！
網民讚有型兼靚仔
唔少網友對呢啲相嘅反應都幾大，有人讚佢哋好年輕、有型兼靚仔，望真少少，岑又真係有幾分似袁偉豪。連佢自己都有留言話「終於面世」，睇嚟呢輯相應該好難得先至搵得番。咁又難怪嘅，九十年代時，影相都仲係用緊菲林，要保存都有一定難度。岑仲問人哋有冇拉斯維加斯嘅酒店相添。可惜九十年代未有香港先生選舉，如果唔係，岑憑住佢幾分英氣，話唔定贏嘅機會都唔細。
