中環出更：符傳富呻工作忙 冇得陪囡囡
影星周潤發喺經典電影《英雄本色》飾演嘅「Mark哥」十分瀟灑兼深入民心，連立法會議員蔣麗芸（阿Ann）都被迷倒。阿Ann近日邀請阿Mark出席其個人節目，不過呢位仁兄就唔敢認做「阿哥」，尷尬笑稱係「Mark仔」咋，佢就係運輸及房屋局政治助理符傳富（Mark）喇！佢仲呻入政府工作後，每周工作七十小時，冇乜時間陪女兒喎！
阿Ann喺新一集《Ann姐會客室》請Mark去傾偈，Mark一聽見阿Ann開場時介紹佢做「Mark哥」，嚇到耍手擰頭。之後佢講到自己大學讀精算，畢業後考會計師牌做核數，愈來愈覺得自己鍾意做「對人」嘅工作，遂毅然加入政黨，更參加過區議會補選，可惜慘敗而回。
每周做70小時 嚇親蔣麗芸
以為入政府輕鬆過做核數？Mark大嘆，依家工作量比起以前係有過之而無不及，平均每周工作七十小時。阿Ann都被呢個數字嚇親，問佢怕唔怕阿女唔認得爸爸？Mark就話呢個的確係心結，阿女今年兩歲，所以佢每晚最遲九點幾必定要返屋企氹阿女瞓覺，到早上五時許又起身照顧佢喎。
卓妮