香港話就話係一國兩制，實情係一國三制，唔信嘅話可以睇吓外國記者會點樣肆無忌憚為港獨分子提供播獨平台。外交部出聲「堅決反對」，港府深表「遺憾」，前特首連日警告切莫觸碰「紅線」，反獨團體仲走埋去踩場，之但係外國記者會一於少理，播獨活動如期進行，你話外國人喺香港冇治外法權，一國兩制唔係怕鬼喎，搵鬼信咩！
呢，香港民族黨頭頭陳浩天尋日唔止「無懼無畏」走去外國記者會演講，仲囂張到話好「榮幸」成為九七後第一個被《社團條例》盯上嘅團體，直頭當港府冇到，當中央透明。事關外國記者會由紅鬚綠眼嘅洋人組成，尋日嘅演講更吸引大批外國傳媒機構捧場，港獨人士狐假虎威，自然鬆毛鬆翼，有恃無恐，「紅線」話踩就踩，盡情咁踩，港府束手無策，你吹佢唔脹呀！
中美貿易戰如火如荼，早排外交部好豪氣咁講咗句「中國不是嚇大的」，查實呢句嘢應該掉番轉由洋大人對中國人講就差唔多。無論港府抑或阿爺，「怕鬼」嘅底牌早被外部勢力睇穿，如果唔係，佢哋點敢喺香港地方、中國領土公然為港獨分子提供講台？
正所謂忍一時得寸進尺，退一步變本加厲，今次先例一開，後患無窮，外部勢力勢必上得床來掀被冚，今日就話邀請港獨分子演講，話唔埋聽日廣邀藏獨、疆獨、蒙獨同台獨分子前來，港獨分子有「主場之利」，仲使鬼山長水遠舟車勞頓去台灣、日本播獨咁辛苦咩。
不過計功夫茶話齋，要數香港最有治外法權、最無王管嘅地方，外國記者會只能認第二，深水埗通州街天橋底南亞村至係冧巴溫，下次有人請陳浩天去「南亞村」鐵竇開壇，咁就最有睇頭嘞。係人都知「南亞村」係「六不管」，保護傘更大，靠山更夠照，陳浩天呢邊播獨，嗰邊有人販毒、吸毒，獨、毒齊奏，直頭威力倍增。獨派喺市民當中冇乜市場，但登橋一呼，率領南亞幫「揭竿起義」，唔好話成立香港國，成立南亞國都咪話冇可能。
可能有人話，港府正準備取締民族黨，睇怕陳浩天都威唔到幾日咯。咁諗就大錯特錯嘞，有辦你睇，好似雙學三子衝擊政總咁，終極上訴得直兼獲大部分訟費，凱旋而歸。一旦民族黨事件最終鬧上法庭，港府分分鐘又係輸官司又賠錢，咁港獨組織就可以攞正牌運作嘞。
一句講晒，中央及港府一日唔改怕鬼嘅劣根性，面對洋人一日直唔起腰桿子，講乜都嘥氣。香港烏煙瘴氣，群魔亂舞，表面係港人治港，實際係洋人治港、洋奴治港，相信好多市民同功夫茶一樣，質疑咁樣嘅回歸究竟有乜意義？