勞福局局長羅致光不久前發表網誌，指社會近日關注本港生育率低，是以希望幫助那些希望生兒育女的夫妻，減輕育兒壓力，營造有利生育的大環境云云。冇靈魂政府至叻廢噏當秘笈，睇吓政府覓地建屋一味「大辯論」，相信最終都係鬧劇一場，填海造地無期，公屋輪候時間沒有最長，只有更長，君不見家陣已由等五點一年變成五點三年喇！
居住問題是許多年輕一輩未敢生育的主因之一，所謂「營造有利生育的大環境」又係齋噏！不過，羅局長跟住就話：「生育並不是單單勞福局可以處理到的議題。」潛台詞即係「生產報國」大家再諮詢、研究、辯論吓都未遲。與此同時，不是有議員說男士侍產假一日也嫌多嗎？政府仲話要由三日增至五日，淨係呢個議題都可以拗到日月無光啦！
事實上，低生育率一直困擾亞洲不少國家和地區。據美國中情局的數字，香港生育率在二百二十四個地區中排行尾四，新加坡應是最低，依次是澳門、台灣。但羅局長指出，如果扣除外傭及「單非」母親數字，香港本地人生育率有可能更低甚至包尾。看來，政府要鼓勵香港年輕夫婦多生育，唔係齋靠拍片鼓勵，啲人就會生夠五個組成籃球隊o架！
冇錯，港府自○二年起，已作出一系列人口政策檢討，林鄭一二年接任政務司司長後，也於一五年初發表《人口政策——策略與措施》，可惜又係淪於口號式嘅大隻講，虛無到飄入雲深不知處，譬如「活化現有人口，包括增加職業培訓及鼓勵老年人口就業等」、「家庭友善政策，協助在職夫婦兼顧家庭和工作」等，全是講多無謂，食多會滯。林鄭若真有「新思維」，應立刻鼓勵生頭胎獎二十萬元，第二胎獎四十萬元，第三胎獎八十萬，生到第五個為極限，即獎三百二十萬，重賞之下必有勇夫。老朽雖年逾花甲，拚老命也生夠一窩籃球隊，以響應內地官媒呼籲：生娃是家事也是國事！