政情：今日你上鏡：陳振英當眾除呔為融入
立法會依家放緊暑假，唔少議員都選擇外遊，就算要喺立法會大樓內工作，衣着都會較為輕便。金融界議員陳振英尋日都有現身喺大樓內，仲要鬼鬼祟祟行埋一邊整理件衫，唔通打扮得太Hea？
其實銀行業出身嘅陳振英，先係打扮得最正規嘅一個，事關佢尋日同一大班建制派議員喺立法會大樓內開記者會，現場超過十名男士就只得佢一個打呔。可能佢覺得自己太礙眼嘞，所以急急腳咁除呔囉，就算在場有人叫佢由得佢都唔理添！
放棄中間位靠邊站
本來陳振英企喺正中間位置，影大合照時夠晒上鏡，但因為除呔嘅關係，佢就被迫放棄呢個有利位置，後退到人群後面，再走到去最左側，齊齊唔扣頸喉鈕咁影相。