政情：湯修齊孖囝囝練拳切磋
家庭與學校合作事宜委員會主席湯修齊（Henry），早前喺社交網站擺上多張佢同個仔湯德安（Harris）練拳嘅相，其中幾張見到兩父子扮鬼扮馬，好搞笑。原來Henry啱啱喺美國公幹返港，即急不及待同個仔切磋拳藝。Henry笑笑口話個仔只得十六歲，但已有六呎五吋高，人高兼手長腳長，對手未埋到身已經被佢重拳擊中。幸好佢自己都有六呎一吋高，練拳時未至處於下風咁話。
憂美國治安差 學定傍身
Henry話Harris學過泰拳，而佢自己最近就學咗詠春，雖然東西方拳藝唔同，但都可鍛煉人嘅意志，令精神集中同埋強健體魄，係殊途同歸。佢都鼓勵個仔學識一種拳藝，事關阿仔兩年後想前往美國升讀大學，但係美國好多地區治安唔好，校園槍擊案頻頻發生，所以如果Harris有拳藝傍身，都係一件好事喎。