政情：港鐵醜聞陳帆 長處低位波叔 民望沉降
港鐵沙中線工程醜聞大爆發，又接二連三爆出鐵路站短筋、削牆同輕鐵站沉降事件，相信政府內部已一片愁雲慘霧，度緊點樣「補鑊」挽回公眾信心。不過，最新一份民意調查結果顯示，受訪市民對特首林鄭月娥同三名司長評分全線下瀉，其中財政司司長陳茂波（波叔）更係自年初公布完新一份《財政預算案》後，長期穩守低位，一直錄得負值。但正所謂低處未算低，運輸及房屋局局長陳帆最近被港鐵醜聞纏身，令其民望值由兩周前嘅正數，急瀉百分之十一，錄得負十個百分點，創下佢上任以來嘅新低，民望插水式暴跌。
香港大學民意研究計劃於本月六日至九日透過隨機抽樣方式，成功以電話訪問一千名市民。調查結果顯示，林鄭同三名司長評分均錄跌幅，波叔評分最低只有三十九點五分，律政司司長鄭若驊雖然唔使「墊底」，都只係高波叔少少，有四十點三分。至於支持淨值，鄭若驊錄得負十九個百分點，而波叔就插至負三十一個百分點。兩人民望猶如下坡車，衝極都未識停。
六名局長支持淨值齊下跌
十三名局長方面，唯一女將、食物及衞生局局長陳肇始喺榜首，支持淨值有正四十個百分點，無錄到有變化。另有六名局長嘅支持淨值則有下跌，當中陳帆同環境局局長黃錦星更以「插水式」暴跌，分別跌十一個百分點及十個百分點，兩人屬於現屆團隊中「唯二」錄得有雙位數跌幅嘅官員。
根據民研計劃嘅「民意日誌」，喺調查期間發生八宗大事，包括沙中線醜聞、土瓜灣站沉降、港鐵高層「被炒」同兩電加價等，相信以上種種就係導致陳帆同黃錦星形象「插水」嘅死因。
淪標準公務員 表現欠理想
總括而言，港府冇一位官員嘅支持淨值可以超過五成，亦冇人可以達到「表現理想」嘅標準，個個都只係做到「標準公務員」，不過不失而已。本來呢個問責團隊，理應有鑊就要孭，陳帆管治不力都唔問責下台，難怪佢嘅民望都出現「沉降」，唔通又係未達「停工標準」，所以佢仲可以繼續開工？