中環出更：工作報告改名 張國鈞問「Fb大神」
好多人遇到生活上嘅煩惱，不論事大事小，都會向網上大神求救，連身兼行政會議成員嘅立法會議員張國鈞（Horace）都唔例外，尋日喺Facebook發貼文叫網民集思廣益，幫手諗諗自己份立法會工作報告叫咩好，仲話一經採納，有份小禮物，「鈞無戲言」添！之但係唔通Horace份報告冇乜主題，所以連個名都諗唔掂？
我哋問過Horace，佢就話報告內容一早已經準備好，打算日後喺網上開一個平台，向網民解釋吓立法會傾緊啲乜，多啲同網民交流吓，所以今次徵求嘅名唔單止淨係工作報告用，仲隨時用嚟做新平台嘅名添！
網民大玩食字提「鈞事報告」
網民嘅建議都大玩「食」字，好似「鈞事報告」、「鈞中情報」咁，其中一個叫「鈞事行動」，呢個名同另一立法會議員何君堯嘅「君事行動」撞晒名，Horace就笑言唔會揀呢個建議，以免撞名咁尷尬。至於佢嘅黨友、油尖旺區議會主席葉傲冬就提議叫「鈞諍」（均真），Horace就話唔錯，隨時成為小禮物嘅得主。
卓妮
