中環出更：推動男女平等 郭美華化難為機
社會上男女地位漸趨平等，政商界中都唔難發現女性嘅身影。不過，國際獅子總會中國港澳三○三區總監郭美華就有另一番體會，因為喺推動女性負責更多會務時都遇到障礙，但就本住將障礙轉化成機會嘅信念去努力喇！
國際獅子總會中國港澳三○三區早前舉辦就職禮，唔少獅兄獅姐聚首一堂，好似有前總監羅少雄、東華三院前主席嘅李鋈麟等，非常熱鬧。
新就任總監嘅郭美華話今年最大目標係提升女性會員數目，因為國際獅子總會一百年來，首次有女性擔任國際會長，所以就有將男女會員比例做到五十五十嘅目標，但佢就大嘆目標難度高，而佢就打算從現有會員入手，吸引佢哋嘅伴侶、女兒一齊加入咁話，佢嘅頭號目標就係哥哥、香港工業總會主席郭振華嘅一家嘞！
雖然郭美華有增加女性會員嘅方向，但推動時都遇過困難，因為嘗試將一個十多年來都由男性擔任主席嘅位置改為女性時，感到對方不太願意，好彩經過多番游說同解釋後都能夠成功。
羅少雄幫拖 叫妻女入會
羅少雄就帶埋三位有潛質加入獅子會嘅人士出席活動，咪就係太太同兩位千金囉，果然響應總監嘅呼籲，幫手提高女性會員喇！佢話加入獅子會多年，而太太當年陀住二女時已經一齊出席獅子會活動，所以由胎教做起，難怪兩位千金都話識唱會歌喇！
至於卸任咗東華主席幾個月嘅李鋈麟就話工作依舊忙碌，因為過往少時間打理生意，卸任後要努力追番先得，皆因力不到不為財喎。佢又認為社會已經男女平等，但男士都應該辛苦啲，負起多啲責任咁話。
卓妮