當年魯迅先生發出「鐵屋吶喊」，試圖喚醒沉睡嘅人群，可惜吖，裝睡嘅人係永遠叫唔醒嘅。好似港府咁，明知南亞兵團罪案愈演愈烈，亦明知市民忍無可忍，偏偏一味裝睡，對正義傳媒鍥而不捨揭露嘅亂象視若無睹，卒之搞到香港淪為罪惡淵藪，可怒也！
講起南亞兵團嘅暴行，真係數到天光都數唔完，好似呢幾日吖，先有深水埗「南亞村」遭縱火，再有假難民參與嘅偽鈔工場被破獲，不過呢啲都係前菜咋，最令人不安嘅，梗係人人都有機會遇到嘅街頭劫案喇。呢嗱，三名找換店職員前晚喺尖沙咀運送千萬現金，南亞兵團夥同本地幫突然殺出，向職員爆樽扑頭，極速搶走裝住巨款嘅行李篋，前後唔使半分鐘，手法快狠準。你話喇，大街大巷、眾目睽睽都照搶，仲想攞人條命咁款，有冇再喪心病狂啲呀！
咪以為找換店呢啲高危行業至會引來南亞兵團垂涎，查實呢班人渣根本冇人性，大小通殺。呢，最近又興起南亞「茄汁黨」，先向受害人潑茄汁等穢物，再藉詞幫忙清潔，將受害人帶到暗處洗劫，九龍灣德福花園最近就有一單，好彩受害人醒目先至逃過一劫咋。睇到喇，只要有油水可撈，有快錢可搵，南亞兵團根本唔理你打工定路過，大人定細路，老弱定傷殘，一律有殺錯無放過，咁搞法，唔通市民出街要帶定一隊保鏢護身？
好明顯喇，南亞兵團搞到天怒人怨，港府繼續假仁假義，遲早累死所有香港人。正如功夫茶多次提醒，港府必須退出國際難民公約，或最低限度重設禁閉營，杜絕假難民來港誘因。但令人百思不解嘅係，港府好似借咗聾耳陳隻耳咁，講極唔聽，勸極唔理，任由治安毒瘤遍地開花。淨係「南亞村」咋，藏污納垢，烏煙瘴氣，最近仲衰到淪為槍械庫，偏偏六大政府部門隻眼開隻眼閉，如果唔係南亞裔籠裏雞作反，一把火燒咗幾間木板屋，等港府清拆喎，等到二○四七都未搞掂吖。
嗱，咪話功夫茶唔醒條好橋，既然港府係都要扮好人，係都要對假難民呵護備至，咁就好人好到底，送佛送到西，唔好要南亞兵團瞓天橋底木板屋嘞，索性將禮賓府讓出招呼呢班大帝，有名你叫禮賓府，梗係招呼上賓啦。仲有喎，門常開政府總部亦係唔錯嘅選擇，大門常開當然招呼從南亞、非洲嚟嘅客人喇，唔通招呼港人咩。
唔係講笑，港府唔止鍾意裝睡，仲出名手指拗出唔拗入，寧願每年倒貼十幾億公帑養治安毒瘤，都唔肯益吓香港人。有呢兩個風水寶地畀南亞兵團入住，總好過任由佢哋四圍走作奸犯科累街坊吖！