政情：龐愛蘭步行如食藥 一日三次免過量
潮流興行路保健康，個個都話要日行一萬步，本身係藥劑師嘅沙田區議員龐愛蘭（Scarlett）就話，若一次過行一萬步需要個幾鐘，唔係人人做得到，仲要小心運動過量反而受傷。佢話最好係好似食藥咁，一日三次，每次十分鐘，咁就最穩陣啦！
着高踭鞋都左騰右騰
Scarlett話一向好鍾意行路，就算着高踭鞋都照行，所以曾經自取日本花名叫「左滕（騰）右滕（騰）」。佢通常係泊定車之後，行一段路去目的地，做十幾年區議員經常要落區，就更加行得多。佢笑笑口話近年興起健步行，先醒覺呢個可能係佢多年嚟保持到苗條身形嘅原因。
講開步行，身兼西太平洋健康城市聯盟指導委員會主席嘅Scarlett，早前應世界衞生組織邀請去分享推廣健康城市嘅經驗，其中建立「易行道（Walkability）」正正係大家關注嘅焦點，佢話建立健康生活態度首要係鼓勵大家行出去，香港地方若有更多舒適嘅步行徑，就可以鼓勵更多人出街行吓啦！