政情：陳浩天演講「播獨」 港台後知後覺禁直播
外國記者協會下周二邀請主張港獨嘅香港民族黨召集人陳浩天出席午餐會演講，引起中方及建制派人士接力猛烈炮轟，並波及曾邀請陳浩天出席上月《城市論壇》直播節目嘅香港電台，有政界中人質疑，以公帑營運嘅港台唔應該提供平台予陳「播獨」，批評港台後知後覺，有關做法並不妥當。據報港台終於下令不可直播陳浩天當日喺外國記協嘅演講，並表明港台作為公營廣播機構，唔應該提供平台宣揚港獨。
要廣播處長作「提示」
據知港台高層尋日舉行例行編審會議，討論陳浩天喺外國記協演講安排，據報廣播處長梁家榮在場作出「提示」，稱陳浩天喺外國記協演講內容提及港獨，港台當日唔可以進行直播或轉播；據引述，梁家榮又稱港台作為公營廣播機構，唔可以提供平台宣揚港獨。
港台機構傳訊組總監伍曼儀接受查詢時證實，梁家榮「提示」當日唔可以直播或轉播陳浩天嘅演講，但可以作出新聞報道。伍重申港獨違法，又話港台立場係唔可以讓一個政客，喺港台搭建平台宣揚政治論點同宣揚港獨。此外，陳浩天於社交網站貼文稱，自己及家人近日均受到跟蹤及滋擾，但堅稱會接受外國記協邀請出席演講。