政情:陳章明抽水 鬧沉降事件嘥公帑 忘記平機會大花筒

政府經常豪花公帑搞基建,搞到一鑊粥之餘,仲鑊鑊新鮮鑊鑊甘,好似港鐵沙中線工程,超支都不特止,仲爆出連串醜聞,就連平等機會委員會主席陳章明都抽水鬧埋一份。陳話,本港殘疾人士就業方面做得明顯比其他地方落後,希望唔好再有咁多港鐵事故,將啲冤枉錢用番喺有需要嘅地方。其實平機會多年來都屢次被批評大花筒,唔止被踢爆豪花公帑喺黃金地段租寫字樓,前主席周一嶽(廢鑊)上任更令該會「轉盈為虧」,仲增設多個高層職位肥上瘦下,同政府嘥公帑一擔擔。

狂數助殘疾人士就業資源不足

陳章明尋日出席一個推動社會多元共融嘅活動,狂數政府喺推動平等機會、鼓勵殘疾人士就業方面做得不足,話平機會兩年前就現行四條反歧視條例提出咗七十三項改善建議,但政府最終只答應優先落實其中八項,明言殘疾人士並唔係要人施捨、同情,而係要一份可以令佢哋發揮自己所長嘅工作。

陳又拋出世界衞生組織相關指引,指一個社會嘅就業人口當中,應該有百分之四係殘疾人士,但香港就只有百分之二,而呢百分之二仲主要係由政府僱用。相比鄰近地區新加坡,就業人口就有百分之八為殘疾人士,可見香港明顯落後,即使政府有鼓勵僱主聘請殘疾人士嘅資助計劃,但申請程序繁複,並非便民措施。

對於政府支援少數族裔嘅工作,陳都好有意見,話曾經接觸過巴基斯坦、印度等少數族裔商會人士,佢哋大呻九七回歸前少數族裔嘅子女較容易投考公務員或紀律部隊,回歸後因為對中文要求提升,政府喺少數族裔學習中文方面又投放不足,令佢哋難以投考有關職位,出路因而減少。

政府喺推動平權方面投放差強人意,陳直言只要「唔好有咁多港鐵事件(醜聞)」,將啲資源放喺應該用嘅地方就可以做到,又話近日沙中線工程問題,予人觀感就係政府使出一大筆錢,但就疏於監管,而對於涉及社會未來如教育、殘疾人士就業方面嘅投放就好謹慎,唔捨得花錢,仲叫政府喺資源投放上要好好檢討吓。其實平機會都被人鬧過大花筒、亂使錢,仲邊有資格批評人吖,加上陳講過因為平機會搬入黃竹坑而搞到冇啖好食,唔通佢忘記咗係被廢鑊連累嘅?

第一手消息請下載on.cc東網iPhone/iPad/Android/Windows Phone Apps