中環出更：廿蚊張再爆 斥勞工界「買豬骨要埋肉」
政府建議將男士侍產假由三日增至五日，身兼行政會議成員同立法會飲食界議員嘅張宇人（廿蚊張）早前爆Seed，話男士侍產假一日都唔應該有，搞到全城怒吼兼鬧佢刻薄！但廿蚊張似乎借咗「聾耳陳」隻耳，乜都聽唔到，尋日朝早上電台繼續講，又話勞工界無止境苛索好比「買豬骨要加埋豬肉」，坦言唔使下下用法律規管，質疑點解要老闆為政府鼓勵生育政策找數。
話侍產假壓垮中小企
廿蚊張似乎對男士侍產假早有不滿，尋日繼續重申對增加侍產假至五天嘅建議有保留，又指現時有能力承擔成本嘅公司已有相關假期，要用法例規管，做法死板，擔心影響中小微企，形容侍產假係「壓垮駱駝的最後一根稻草」。
另外，廿蚊張有黨友更喺社交網站發貼，話依家香港人平均生兩個，成世人都係得嗰幾日侍產假，寸爆咁話「使唔使咁啊？」就此言論廿蚊張不作回應，但就話自己係行會成員，他日投票時都會審慎考慮，而佢嘅說法只係反映業界意見喎。
卓妮