中環出更：胡劍江換冷氣3日內已收走舊機
政府近日實施「四電一腦」回收，有說三日就會嚟回收，但有啲市民等咗十幾日，先有人嚟收，引起好大民怨。日前喺一個活動上遇到香港潮州商會會長胡劍江，佢就話要講句公道說話，因為佢最近啱啱換咗部冷氣機，真係三日之內就收走咗，又話呢個新措施對環境保護係好好嘅，所以大家要畀啲時間嚟適應。
講開環保，同場嘅民政事務局副局長陳積志就話，好多人認為家電唔要用到壞咗先好換部新嘅，其實咁嘅諗法唔啱，事關舊款嘅電器都好嘥電，反而新機就慳電好多咁話。講起呢排天氣咁熱，男士要打呔出街都好辛苦，佢就話因為要出席公眾場合，所以先執正啲打番條呔，若果喺辦公室做嘢，就唔打呔嘞！
林超英繼續硬銷USB風扇
一直追求環保生活嘅天文台台長林超英就繼續硬銷佢嘅USB風扇大計，佢話唔單止早已棄用冷氣機，最近仲掉埋大風扇，轉用直徑只得六吋的USB風扇，火數由三、四十降至兩火半，慳電級數又再升級。佢仲話好想幫劏房戶解決夏天熱到暈嘅問題，方法就係將四把USB風扇安裝喺適當嘅位置，利用對流原理令屋內有涼風。佢笑笑口話要搵人贊助佢做實驗，每戶三百蚊都唔使，仲話太太聽完都話係好橋喎。咁就希望佢快啲搵到多啲贊助，快啲開工，為班劏房戶解熱。
轉頭就見到東華三院副主席馬清揚（Philip）同堂哥、保良局副主席馬清楠（CN）都喺度，CN嘅爸爸馬錦明做過保良局主席，而Philip嘅爸爸馬錦燦就做過東華主席，咁睇嚟做善事係家族嘅良好傳承喇！
卓妮