古人有句說話係咁講嘅：「不近人情，舉世皆畏途；不察物情，一生俱夢境。」講到不近人情咯喎，又點可以唔提特衰政府？尋日就有外判清潔工鬧爆食環署，大熱天時連水都唔畀人飲呀陰功，咁刻薄都得，唔怪得港府被人話帶頭做無良僱主啦。
呢，尋日就有三百個來自觀塘、牛頭角同油塘區嘅食環外判清潔工搞罷工，抗議食環署刻薄無良。有清潔工話掃咗兩個鐘頭街，停低想飲啖水，都被食環狗仔隊噴到一面屁兼札名，又成日借啲意投訴佢哋手腳慢，搞到被外判公司扣人工。有工友就鬧爆食環搞咁多動作，無非想搵藉口向外判公司施壓，仲話年長工友表現唔好就炒晒佢哋咁話，所以要求同食環署、外判公司一齊開會拆掂佢。食環署話就話會對清潔工放寬啲，氹住班清潔工復工，但只係肯同外判公司開會，唔敢同工友當面傾，擺到明心中有鬼啦。
即係咁，若果真係有表現唔達標嘅清潔工，被炒魷魚都係咎由自取，與人無尤，本報都曾經報道過有外判清潔工「蛇王」，掃半個鐘頭垃圾就瞓覺，又有人開工時間秘撈賣紙皮咁，食環署加強監察本來係無可厚非嘅。之不過，家陣天時暑熱，連日三十幾度高溫，當局竟然連水都唔畀人飲，又真係太過分，萬一啲清潔工中暑開唔到工，唔通班官老爺會親自落場倒垃圾咩？
係人都知，港府早年為咗慳皮，將唔少原本政府負責嘅工作外判出去，好多外判公司將價錢壓到低一低，前線清潔工嘅待遇已經麻麻，依家當局仲捽外判公司，外判工工作量加多兩錢重，即係逼人去死啫。最諷刺係，政務司司長小肥張話政府鼓勵六十五至七十四歲「少老」重投就業市場喎，講就好聽喇，可惜係同遮唔同柄，同人唔同命，所謂延長退休其實係為高官翻閹度身訂造，講到基層咯喎，當局就即刻帶頭歧視長者，乜鬼「好打得」吖，自打嘴巴就叻。
講真，如果表現欠佳就一定要炒魷魚，咁港府一眾高官應該全部炒晒，統統冇得留低。事關香港庸官廢官當道，房屋、醫療、教育、安老固然瓣瓣唔掂，仲要基建醜聞係咁爆，南亞假難民問題愈來愈失控，甚至連清潔衞生呢啲簡單嘢都搞到一鑊泡，問你點頂！
冇法喇，港官小事做唔好，大事做唔到，返工淨係坐冷氣房發白日夢，仲要厚面皮領取世界一流嘅薪酬，呢班人汗都唔使流多滴，又交唔出成績，唔好話旨意佢哋幫手倒垃圾，佢哋本身就係最昂貴、最應該送去堆填區嘅垃圾，納稅人嘅血汗錢真係使得冤枉呀。