香港政府管治無能，主因係凡事得過且過，拖拖拉拉，議而不決。呢，好似淫審處過去多年嘅裁決經常鬧出大笑話，經典例子是將著名雕塑「大衞像」列為不雅物品而醜出國際；又如隨己好惡，大玩針對，同一輯英國女星Kelly Brook的性感照片，竟可以出現三種評級，登喺東方報業集團旗下報章就評為二級不雅，登喺壹淫媒旗下嘅爛果報就評為一級非不雅，登喺外國雜誌就直頭送審都慳番。你話呢個淫審處嘅存在，唔係香港文明之恥又係乜嘢呢？
最近，淫審處又將村上春樹嘅小說《刺殺騎士團長》評為二級不雅，事件掀起風波之餘，有人認為淫審處嘅條例過時，理應改革並重立標準，否則盞成日丟人現眼。原來早在二○○八年政府已經話要全面檢討淫審條例，並分兩階段諮詢民意，之後曾向立法會提交檢討結果，包括把淫審處評定類別的行政職能廢除，只保留負責履行司法裁定職能，且提高罰則；同時建議審裁委員的總人數由約五百人增至一千五百人，而每次聆訊的審裁委員人數由最少兩人增至最少四人，以減少偏頗和提高審裁處的代表性。
事實上，有關修例及改制已研究諮詢了成十年，可是至今未有寸進。見微知著，政府的佛系思維擺到明就係「放下」，可以拖得一時得一時，反正好官我自為之，高薪厚酬不會少個崩，何樂而不「放下」？
聞一知十，保安局呢頭煞有介事話要依法取締香港民族黨，嗰頭又提供二十一日申述期。阿哥，取締一個非法港獨組織，政府都船頭驚鬼船尾驚賊，民族黨召集人陳浩天仲唔玩到盡就奇，於是要求多多反客為主。保安局為配合對方律師，又將申述期延長至四十九日，令陳浩天有機會畀外國記者協會邀請做演講嘉賓。港府姑息養奸，把一隻嗡嗡蒼蠅縱成恐龍，議而不決，真係睇見都眼火爆！