政情：馮程淑儀當黑 遊印尼遇地震
政策創新與統籌辦事處總監馮程淑儀前年四月仲係民政事務局常任秘書時，爆出換樓醜聞，涉逃稅約一百萬港元，至今廉政公署仍然調查緊，事件一度令佢官都冇得升。唔知係咪人衰行路打倒褪，佢最近放假去印尼玩，點知就遇到地震，真係當黑喇！
啟用Fb平安通報站
據了解，馮程喺八月三日至八日期間放假，佢尋日啟用咗Facebook嘅平安通報站，話自己經歷咗印尼龍目島嘅黎克特制六點九級地震，不過用得通報相信只係有驚無險，已經平安無事。查實今次地震傷亡數字都好高，更一度出現海嘯警報。中國駐當地領事館話，喺當地嘅中國旅客約有二百幾人，至少有八個係香港人，唔知馮程係咪其中之一呢？