政情：周澄已為人妻 吳文遠有「新伴」
唔知今年係咪大旺政界人士，唔少單身貴族都有着落。前日我哋喺中環一間超市外，發現社民連主席吳文遠同一名女子排隊買嘢飲，二人互動十分親暱，貌似一對小情人。吳好快發現被撞破，兩人即刻行到「離行離迾」，好似唔熟嘅朋友咁。之後呢位女士仲先行一步，留低吳自己一人揀沙律。
吳於三年前同「民主小女神」周澄分手，閃電結束不足一年嘅戀情，周澄其後「封盤」做人妻。正所謂「新娘結婚了，新郎不是我」，相信周澄結婚，吳文遠個心都唔好過，所以單身咗幾年，外界都唔知佢有冇新女伴。
既然被發現，梗要問清楚究竟呢位係女友定太太？吳文遠就笑稱「唔講呢啲喇」，再問到係咪一齊買餸玩煮飯仔，定係一盒沙律兩份食？佢都係識笑唔識答，之後向碼頭方向離去。其實拍拖好正常，使乜咁怕醜呢？