政情：致詞「支持」變「豬持」 張建宗講普通話惹笑
政務司司長張建宗嘅普通話水平一向好普通，但係佢依然唔怕被人笑，每次活動有需要時，仍然努力講普通話。尋日佢出席「足球發展伙伴計劃」青年交流團授旗儀式，以普通話致詞時，一句「冰島只有三十多萬人」，幾乎完全係廣東話，現場觀眾都忍唔住笑。
臨尾仲走埋音
今次活動係有關香港同北京嘅青年足球隊去冰島集訓及進行三角賽，張建宗以兩文三語致詞時，喺普通話部分，近一半都令人聽唔明或者變成歪歪哋嘅廣東話，講到臨尾仲要有啲走音添。同一句夾雜咗普通話同廣東話，變成廣東話嘅字包括「推動」、「青年」及「我相信」，講到「支持」個支字，仲變成廣東話嘅「豬」字。
講真嗰句，張建宗已經六十幾歲人，要學一種新語言都唔容易，依家有一半講到係普通話，已經算有進步。不過下次可以考慮普通話嘅講詞精簡啲，咁就練少幾句，又準確啲啦！