政情：葉文斌 扶委會試煉 立會考牌戰

睇番今次扶委會委任名單，多個政黨代表都進行換血，但換入嘅年輕代表喺政界都有一定知名度，好似新民黨由立法會議員容海恩接替已退黨嘅田北辰、工聯會由前立法會議員鄧家彪接替榮譽會長林淑儀，但民建聯（民記）作為建制第一大黨，改由葉文斌加入扶委會就有啲出人意表，因為葉過去主打交通同衞生議題，甚少涉獵社福議題，而且知名度相對其他政黨代表低得多。

曝光率突增 連番獲委任

不過，佢近期曝光率亦都因輕鐵沉降問題增加，上月底又再獲政府委任為回收基金委員，任期喺今個月初開始為期三年。短時間內連番獲政府委任，睇嚟佢都有唔少機會可以交出成績。

有民記中人透露，扶委會係對葉文斌嘅考牌戰，如無意外，未來將會由佢接替梁志祥出戰立法會新界西，而葉過去曾任立法會議員陳克勤助理，更重要嘅係佢擔任過另一民記資深成員嘅助理而受到重用。雖然過往元朗區議員呂堅被睇高一線，為接替梁志祥嘅人選，但據悉呂偏好研究工作多於走到最前線，而葉文斌已經兩次排喺民記嘅立法會新界西參選名單，上屆就排喺梁志祥名單第四，所以更上一層樓都唔係無可能。

傳接替梁志祥 出戰新西

葉接受查詢時就話，民記一向重視同信任新人，而且黨內都唔止佢一個年輕人有機會，好似回收基金亦都有另一黨友楊文銳同獲委任，而呢次委任相信同以往做陳克勤助理時跟開環保議題有關。至於扶委會同參選立法會，佢就話係兩回事，估計係曾經排喺梁志祥參選名單，而且地區工作與梁密切，外界先有咁嘅猜測啫。

其實民記早喺今屆立法會已經進行大換血，四名資深年老議員齊齊退下火線。現時議會中，民記都有三人年過六十，現時開始部署鋪路畀黨內年輕一輩，葉文斌成為熱門交棒人選，都好合理。