中環出更：林景昇樂做煮夫 巧手製麻婆豆腐
「男主外，女主內」嘅年代已經過去，女性可以有自己嘅事業，而廚房亦唔再係女性嘅天下，好似傑出青年協會前主席林景昇及太太莫雅清各有事業，但都會一星期抽一晚玩煮飯仔維繫感情。
早前喺城市女青年商會舉辦嘅全港時尚專業女性選舉頒獎禮上，見到林景昇夫婦，事關林太係六名得獎者之一。林為咗支持太太出外拚搏，會肩負下廚同執屋重任，更上網睇片自學煮餸，煮出連太太都大讚嘅麻婆豆腐。佢都好鍾意食麻婆豆腐時嘅麻痹感覺，好似工作辛苦時要麻醉自己，再勇往直前衝落去。佢係太太今次競逐獎項嘅提名人，係因為覺得太太為人樂觀，即使上年患上大病，亦都克服困境，無選擇放棄。
太太莫雅清研究湯水養生
莫雅清就認為，社會已經充斥太多負能量，所以希望自己作為榜樣，教大家唔好輕易放棄。佢話上年曾經兩度接受手術，大病過後令佢由以往嘅執着同只顧追求目標，變得隨心同注重健康及家人，現時更會研究湯水，同身邊嘅人分享養生之道喇！
時尚專業女性選舉已經係第八年舉辦，城市女青年商會會長李貝詩、籌委會主席吳曉燕都有出席支持。另外多名得獎者都獲家人撐場，好似另一位得獎者徐曉鶯，從事房地產嘅徐，每個星期都要往內地公幹，好彩丈夫只需要喺香港工作，兩人可以協調時間，而佢會靠科技遙距幫囡囡對功課，亦會為囡囡多安排戶外活動，等佢學習獨立。
卓妮