正所謂面係人哋畀，架係自己丟，港府打擊港獨勢力聲大大冇貨賣，口講「立場堅定」、「絕不姑息」，實際上又怕痕又怕痛，執法拖泥帶水，擺明買咗班港獨分子怕。港府姑息養奸，班牛鬼蛇神仲唔有恃無恐，也文也武咩！
話說外國記者協會最近邀請香港民族黨召集人陳浩天出席午餐會演講，談及香港成為「獨立國家」可能性等議題。民族黨在港府查禁之列，身為頭頭嘅陳浩天好似攞正牌咁款，登堂入室成為外國組織座上賓，大肆播獨，已經令人搲爆頭，而更弔詭嘅係，港府居然借咗聾耳陳隻耳，一味扮鴕鳥，搞到外交部要親自開聲要求外國記協取消邀請，強調香港係中國不可分離嘅部分，港獨勢力公然宣揚及從事分裂國家活動，已經觸碰一國兩制嘅底線，嚴重違反中國憲法、《基本法》以及香港法律，堅決反對任何外部勢力為港獨分子散布謬論提供講台云云。
諗都諗到喇，外部勢力就係唯恐香港不亂，佢哋為民族黨一類港獨組織搖旗吶喊，提供輿論平台，亦唔係一朝一夕嘅事，叫佢哋「金盆洗手」，同與虎謀皮冇乜分別。大家有眼見，自從陳浩天出事之後，本港反對派及其外圍組織打着「言論自由」嘅旗號大力聲援，外國記協亦以捍衞「言論自由」為名，堅拒收回邀請。港府明畀人剃眼眉事小，阿爺喺鬼佬面前冇face嗰度樣衰吖嘛。
咪睇班鬼佬開口埋口言論、新聞自由，實際上雙重標準，龍門任搬，偽善到冇人有。係人都知言論自由並非絕對，唔同國家有唔同底線，試吓有人喺德國宣揚納粹思想，又或者喺美國為恐怖大亨拉登歌功頌德，睇吓班鬼佬同唔同你反枱吖嗱！咁當然喇，蒼蠅不叮無縫的蛋，保安局呢頭話依法取締民族黨，嗰頭提供二十一日申述期限，咁都算嘞，如果當局揸正嚟做，民族黨呢一兩日就會正式冚旗，外國記協根本無機會請陳浩天走去發噏風，偏偏當局又主動配合對方律師，將申述期延長至四十九日，做戲都冇咁好默契，結果咪夜長夢多囉。
當局「呵護備至」咯喎，港獨分子自然心領神會，定過抬炸彈。之前啪偉哥嗰個黃台仰都仲話要着草避禍，家陣陳浩天唔單止招搖過市，仲明寸港府話外國記協之所以邀請佢，就係因為知道佢被當局要求提交書面申述，言下之意，即係本少爺有外部勢力撐腰，港府吹佢唔脹。
冇計喇，港府怯於外部勢力，老虎屁股摸不得，狐狸尾巴唔敢掂，好似漢奸黎咁，正因為有洋大人照住，被指策劃佔中、黑金禍港、刑恐記者，統統毫髮無損，仲威水過古時候嘅鐵券丹書。老漢奸「珠玉在前」，小漢奸梗係有樣學樣喇！