政情：今日你上鏡：許曉暉無官一身輕

現屆政府上場已經一年，離任嘅舊高官過完冷河後陸續搵到新工。早前我哋遇到民政事務局前副局長許曉暉同佢爸爸、堂家姐一齊飲茶，一行人輕輕鬆鬆，睇嚟佢真係「無官一身輕」。許離開官場之後明顯瘦晒，次次見親佢都忍唔住關心吓佢嘅健康情況。許例牌笑笑口話暴瘦係因為冇做官之後，應酬少咗，唔使成日食得咁油膩，而且作息定時，所以咪瘦番啲囉！