政情：譚香文批泛民 為補選四分五裂

因為宣誓風波而被取消立法會議員資格嘅劉小麗，有意出戰九龍西補選，最終能否勝出，最大關鍵係剛退出民協嘅前立法會議員馮檢基會否參選，阿基尋日出席電台節目時話，只係「呢分鐘」唔考慮參選。阿基近期多次公開批評民主派上次初選嘅「屈基（逼退馮檢基）」事件，又不滿未就今次補選安排初選揀參選人。

劉小麗仍未獲阿基支持

阿基係民協前資深成員，喺九龍西打滾多年，有一定支持度，小麗到依家仍未獲阿基支持，搞到連譚香文呢位民主派都質疑咁樣點打補選。睇嚟民主派一盤散沙係死症，始終團結唔到喇。