政情：陸頌雄搬議辦開路戰九西？
工聯會「穩袋」嘅兩個勞工界功能界別議席，按慣例只係「旋轉門」，該會兩名現屆勞工界議員陸頌雄同何啟明下屆立法會選舉都要轉戰地區直選，本報早前講過兩人好可能透過黨內初選，爭奪盛傳做埋今屆就退休嘅黃國健（KK）嘅九龍東議席。不過，陸頌雄似乎仍然唔放心，上月底靜靜雞將其中一個議員辦事處（議辦）由灣仔搬到深水埗，唔通陸頌雄想為轉戰九龍西選區試水溫，搵多條後路？
陸頌雄進身立法會後，喺全港共有三個立法會議辦，分別位於其區議會老巢元朗天水圍、大埔富善邨及港島灣仔。其中灣仔嘅議辦原來係由香港鐵路工會聯合會持有，鐵路工會出身嘅陸頌雄被聯會視為「親生仔」，所以一直可以免費借用。不過，長貧難顧又好，唔想寄人籬下都好，總之雙方早前決定「分手」，陸周圍物色新議辦選址後，最後揀咗深水埗福華街一個位於五樓嘅單位，正式落戶九龍西。
身兼元朗區議員嘅陸頌雄，下屆按慣例須轉戰地區直選，但元朗所屬嘅新界西已經有黨友麥美娟坐鎮，所以陸曾經傳出會轉戰工聯會未有插旗嘅九龍西，早前更傳出會內已決定就陸同何啟明邊個接棒KK嘅九龍東議席舉行初選添。據了解，陸仍未決定出戰邊一區，為確保有一區可爭，無論如何都插隻腳落九龍西先。另外，會內亦配合陸進軍九龍西嘅策略，大部分會址喺九龍西嘅工會同團體，都由陸做中間人去邀約官員會面，形同工聯會嘅九龍西代言人。
陸稱避貴租 搬到上五樓
陸承認，有建制陣營都問佢係咪想選九龍西，但佢話揀深水埗區嘅原因係租金平，笑言為避貴租已經「搬到上五樓」，唔關試水溫事喎。至於九龍西代言人一說，佢就解釋自己同何啟明都係勞工界議員，兩人以行業分工協助工會，佢主力幫公共事業及交通業，咁啱呢啲工會會址都集中喺油尖旺一帶，所以有專門幫九龍西工會嘅印象。
不過，建制派喺九龍西競爭激烈，今屆呢區首輪補選仲有民建聯鄭泳舜爆冷勝出，十一月第二輪補選亦見到建制陣營爭崩頭出選，陸要爭取二○二○年出戰九龍西，難度比爭九龍東議席更高。