中環出更：老闆唔易做顏子豪嘆似社工
僱主同僱員關係有時好似對立，要相處融洽都係一門學問。搞物流生意嘅騰龍青年商會會長顏子豪出席一個推動勞資共融嘅活動時就話，做老闆好似做社工咁，考慮嘅嘢比打工仔仲多，聽落好似有啲怨氣咁噃。佢就話，咁先可以同下屬打成一片，同聲同氣，而且請人都易啲咁話。
顏子豪又話，現今做老闆要關注到下屬嘅訴求，如家庭需要等，佢舉例有下屬要接小朋友放學，就要安排佢哋準時四點收工，對於有經濟困難嘅下屬，就會安排佢哋多啲加班喇，聽落都幾有人情味，難怪佢都自言能夠同下屬打成一片。不過，佢就認為呢種模式只適合中小企，因為大公司員工數量太多，好難個個照顧到，但好彩物流業嘅打工仔鍾意做中小企，貪夠人情味。
簡汝謙話90後冀被尊重
香港中小型企業聯合會主席陳麗芳當日都有出席活動，多個商會成員亦都到場取經，包括國際青年商會香港總會會長簡汝謙、北區青年商會會長黃潔盈、維多利亞青年商會會長王詠詩等。簡就話，九十後成長環境同上一代唔同，薪酬並非佢哋最重要嘅考慮因素，而係要追求喺職場上得到尊重、關懷等，所以佢都寄語老闆要明白呢個趨勢喇。
勞工及福利局副局長徐英偉話加入政府前打過六、七份工。轉工都轉得好頻密噃。佢解釋，當時從事嘅金融界普遍都係幾年轉一次工，因為轉工會令人工同職位都高咗，而現時香港好多行業都有同樣情況，而且年輕人轉換吓環境都係件好事。之不過咁樣就搞到唔少僱主好頭痛，因為會好難請人同留人喇。
卓妮