月光光，心慌慌，家陣坐港鐵仲慌。梗係喇，港鐵沉降問題愈演愈烈，多個車站嘅沉降速度都有惡化迹象，乘客坐車好似搵命博咁款，唔驚就假。最弊係當局對於仲有幾多車站出事諱莫如深，搞到人人自危，你話死唔死吖。
呢，就講東鐵大圍站吖，上月中先至揭發紅磡方向月台車尾位置同埋一支架空電纜杆沉降廿一毫米，附近地盤需要即時停工，殊不知屋宇署幾日前再進行檢測，赫然發現沉降不但冇停止，仲惡化到廿三毫米添。即係話，短短半個月，沉降幅度又多咗一成，再咁落去，車站同建喺浮沙之上有乜分別呀？正如工程師話齋，沉降幅度愈大，愈影響行車安全，估計即使地盤停工，沉降仍會持續，乘客食定驚風散都得嘞。
咁仲唔止，輕鐵天榮站月台沉降惡化至八十九毫米，足足超出二十毫米嘅安全標準三倍，屋宇署唔係亡羊補牢，反而話因應個別車站結構情況唔同，將安全標準大幅提高至八十毫米，即刻「化險為夷」，龍門任搬，問你服未？至於日前先被踢爆嘅輕鐵屯門泳池站，沉降問題舊年已經出現，但港鐵同港府臭屎密冚，直到石屎躉縫隙擴大超過二十毫米，先至不認不認還須認。都仲未講月前首個被揭發沉降嘅西鐵元朗站仍接受監察，情況會唔會惡化，根本冇人講得埋。
睇到喇，沉降咁大件事，港府同港鐵竟然遮遮掩掩，部分車站沉降已有一段時間，當局一直秘而不宣，好似鴕鳥埋頭沙堆就以為危險唔存在。最抵死係，運房局高官早前上立法會，自爆鐵路保護區有多達六十四項受沉降影響嘅監察工程，引起議員嘩然，難得官老爺依然面不紅、氣不喘，完全唔當一回事，唔理議員點追問，都唔肯講沉降工程及地點，一副你吹我唔脹嘅態度。既然有港府高官壯膽，港鐵梗係攞正牌十問九唔應喇，難怪每當傳媒問起醜聞問題，港鐵都好似借咗聾耳陳隻耳，睬你都傻。
真係愈講愈火滾，行車安全關乎人命，月台沉降絕對唔係講玩，何況港鐵仲係龍頭交通工具，每日載客量數以百萬計，萬一出事就一鑊熟，港鐵同港府合謀忽悠公眾，有冇再離譜啲呀？再講吖，港府作為港鐵最大股東，港鐵高層又係由港府任命，有乜理由連監管責任都放棄，任由港鐵攞乘客命仔較飛o架？若然真係搞到車毀人亡，林鄭點樣「膽自大」都孭唔起喇。
講起就唏噓，港鐵過去係傲視全球嘅香港品牌，家陣竟然極速墮落，醜聞仲要井噴式大爆發。有人話港鐵月台沉降正正係香港沉淪嘅縮影，唔到你唔信囉。