港鐵近年屢爆工程醜聞，最突出的莫過於沙中線紅磡站的剪鋼筋事件，之後又爆出會展站牆身建造有問題。至於廣深港高鐵香港段的興建亦波折重重，由最初預計一五年落成延至一七年底，家陣又話預計今年九月通車喎，政府嘅宣傳片稱「童年的夢已經不再遙遠」！耗資成千億元嘅高鐵香港段，試車時爆出列車偏離路軌事故，唔通真係好事多磨？希望通車時順風順水，千祈咪令老朽童年遙遠的夢變成夢魘！
香港速度曾經係高效廉能嘅代名詞，可惜一切已成過去，無論墟市審批、覓地建公屋、填海造地等，都要天長地久的諮詢又諮詢、研究復研究，你話「香港速度」怎麼不會淪為笑話呢？呢，港珠澳大橋內地段工程一直進展順暢，香港段進度則諸多阻滯，早前爆出「飄移」醜聞、混凝土測試造假，又被揭疑因趕工導致人工島有二十多個鋼圓筒向外伸延三米以上，最新消息指因為進度有阻滯，睇怕未能在九月前啟用喎！
港府至叻跌落地揦番拃沙，強調並非因為香港口岸人工島旅檢大樓出現漏水事故，只不過係通關和出入境等各方面安排較為複雜，準備需時。由於大橋牽涉港珠澳三地政府，所有事項皆需三地互相協調，通車日期當然也不例外，必須獲一致共識才可敲定；港府呢招「太極推手」難得有內地、澳門可借力，一日彼此未曾有「協調」，未曾正式公布通車日期，點講都唔算係延誤通車喇！「準備需時」四字有千鈞之力，之前畀人批評話「香港速度」已淪笑話，尤其是大型基建經常出現工程延誤，如今可以一筆勾銷矣！
港珠澳大橋被視為「新世界七大奇迹」，中央重視可想而知，原以為八月可以通車，如今九月都未必得，好彩冇靈魂政府搵到八個字做擋箭牌：「安排複雜，準備需時」，換言之，責任不在港方。港式太極推手真係有啲料到o架！