政情：退出街工一個月 黃潤達即獲招攬
街坊工友服務處立法會議員梁耀忠喺街工勞工組嘅糾紛，導致街工爆發退會潮，葵青區議員黃潤達亦係其中一人。而黃同街工「分手」只係一個月，就已傳出佢加入工黨嘅消息。工黨同街工同屬民主派，兼且都係主打勞工議題，黃加入工黨都唔出奇。
指現階段冇打算加入政黨
黃潤達喺七月一日正式退出投入工作咗十六年嘅街工，回復自由身。話咁快就傳出佢加入工黨喇！不過黃接受傳媒查詢時就只係承認有工黨元老喺今年七一遊行期間，笑問佢有冇興趣加入，但佢就希望自己專注地區工作，可以同唔同民主派政黨喺地區議題上合作，故現階段冇乜打算要加入政黨咁話。
現時工黨只有三名區議員，包括東區區議員麥德正、沙田區議員葉榮同屯門區議員譚駿賢。黃潤達嘅地區工作經驗豐富，如果加盟工黨，都可擴大工黨喺區議會嘅版圖。不過，呢啲嘢都要你情我願先得嘅。