政情：張佐民返台做眼手術 嘆港醫療費高
香港私營醫療服務收費愈嚟愈貴，所以近年城中名人興起到台灣或東南亞做健康檢查兼旅遊。本身係台灣人嘅港澳台灣慈善基金會主席張佐民（Tommy）早前都返去做體檢，點知驗出右眼出現黃斑裂孔，需要做手術，於是佢安排時間返台開刀，休養咗個幾月先可以坐飛機返港。今次經歷令佢感慨萬千，但唔係領悟「健康才是財富」嘅大道理，而係香港嘅醫療收費真係好高囉！
港收20萬 貴台24倍
Tommy話今次佢一半享用全民健康保險，一半自費，結果總共使咗三萬二千元新台幣（約八千二百港元），同類手術若喺香港做需要廿萬港元。換言之，香港收費比台灣貴廿四倍。佢話平時聽得多台灣健保又平又正，今次總算開咗眼界。不過如果有得揀，梗係最好一世都唔使用到健保啦！