政情：容海恩下周五入門 姑爺有話兒
新民黨立法會議員容海恩（Eunice）同該黨政策總裁袁彌昌日前傳出婚訊，政圈更加盛傳兩人係奉子成婚。消息指，Eunice將會於下星期五出嫁，當日上午會有接新娘環節，之後就喺尖沙咀一間酒店舉行婚禮，婚禮只會邀請親友出席，似係想一切從簡。
翻睇資料，下周五係農曆六月廿九，即踏入農曆七月鬼節月份前最後一日，一對新人可能想趕喺農曆七月前結婚。
而當日亦都宜嫁娶，早上九時至十一時，以及下午一時至三時係吉時，而上午十一時至下午一時就係凶時。如果Eunice安排喺當日早上進行接新娘環節，睇怕就要喺上午十一時前出門喇！
林雨陽話親戚要「好好選擇」
Eunice同袁彌昌結婚後，就會同袁彌昌妹妹、人民力量前主席袁彌明（Erica）同Erica老公林雨陽成為一家人。
不過早喺兩人傳出婚訊前幾日，林就率先喺其社交網站發貼文，話︰「You are what you choose. 老婆、朋友有得揀。其他親戚要揀時，請好好選擇。」唔知林對Eunice呢位舅嫂，係讚定係彈呢？