政情：葉劉陳家強抬轎撐陳凱欣戰補選
本報率先報道食物及衞生局前局長高永文參加立法會九龍西補選機會渺茫，政界傳出建制派有意搵與高永文關係密切，亦係佢嘅前得力助手、食衞局前局長政治助理陳凱欣出戰補選。前高官及建制派尋日紛紛公開為陳凱欣抬轎，身兼行政會議成員、立法會議員嘅新民黨主席葉劉淑儀表明如果陳願意出選，佢一定支持。財經事務及庫務局前局長陳家強亦喺社交網站貼文，話對於有指陳凱欣會出戰補選係「Sounds good to me（對我來說很好）」。
張志剛報章撰文點名支持
曾經做過保安局局長嘅葉劉，尋日撰文讚陳凱欣做政助期間，處事勤奮，為人工作積極兼具親和力，風評甚佳，係一位有實力嘅年輕媽媽，同新民黨素來友好，經常聯絡，希望陳凱欣可以秉承高永文熱心服務香港嘅精神，喺更大嘅層面服務市民、為民請命，而佢自己必定鼎力襄助，全力支持。
葉劉又話好多人關心高永文會唔會出戰九龍西補選，佢知道高永文工作極為繁重，若高永文可抽空參與政黨工作，早已邀請佢加入該黨做副主席，而高永文上月落實擔任該黨顧問，係深慶得人。被問到會唔會邀請陳凱欣加入新民黨，葉劉接受查詢時話入唔入黨唔係問題，新民黨唔係見人就擸咁話。
除咗兩個前高官力撐外，連行政會議前成員張志剛亦喺報章撰文，點名提到建制派可以發掘包括陳凱欣等政壇新進去參選，不必勞駕高永文。
傳高永文早表明參選機會微
其實，建制派圈子流傳，高永文一早已經向內部表明，參選機會好微。高永文曾經公開講過，離開政府後，最大志向係恢復臨床工作，任何下一步嘅工作路向都要確保不影響臨床工作，若有任何人適合參加補選，佢會全力支持。至於陳凱欣就一直代高永文回應傳媒，指高永文仍未決定會否出選。到底真命天子係邊個？大家都好想知嘞！