中環出更：陸頌雄改圖成癮 化身人肉串燒
唔少政界人物都透過網上改圖，以表達自己政策主張，工聯會勞工界議員陸頌雄（Michael）亦唔執輸，尋日於網上改圖冇底線，將自己化身人肉串燒，只見幅圖寫住「三蚊一串、十蚊三串」，旁邊有樽鹽，莫非佢想兼職賣串燒？
提醒戶外工作者做足防曬
原來Michael想表達一個信息，就係呢幾日天氣酷熱，喺街上如做唔足防曬措施，一不小心就會變「燒肉」，藉此提醒戶外工作嘅打工仔，要着淺色衫，多飲水及休息，而工作場地亦要做足遮陰措施，以防不適。
其實Michael近日似乎改圖癮發作，前日於網上亦改圖將自己騎住一隻蝸牛，寓意收入慢如蝸牛移動，而樓價升幅快到好似一架跑車咁，明言「仲有邊個買得起樓？」
不過話時話，Michael身為雙料議員，每月收入超過十萬元，若然佢都覺得收入追唔上樓價，普羅市民就更加「望樓興嘆」嘞！
卓妮