中環出更：周宛賢青海做義工開心過巴黎旅行
暑假期間係外遊旺季，香港表廠商會會董周宛賢（Amy）最近就去咗青海玉樹，但唔係去度假，而係同無國界義工一齊去山區探訪。Amy早前出席一個音樂欣賞晚宴時，講起今次旅程顯得好雀躍，笑笑口話今次八日行程完全冇得沖涼，係人生第一次咁耐唔沖涼。雖然辛苦，但笑言參加呢種旅行仲開心過去巴黎添！
Amy話冇涼沖係因為當地冇水，有限嘅水要用嚟煮飯，所以領隊亦溫馨提示毋須帶太多衣物，只需着住一套衫出發，再帶一套臨上機返港時替換就得喎。之後見佢喺社交網站話旅程時出現咗高山反應，仲感慨堅持同任性只係一線之差，結果搞到眾人因佢而更改行程，覺得唔好意思添！
李秀恒為攝影集搞音樂會
講番晚宴，當晚係香港中華廠商聯合會永遠名譽會長李秀恒（Eddy）為佢本一帶一路攝影集舉行視聽音樂會，好鍾意去旅行嘅教育局前局長吳克儉都有出席，佢話去旅行時亦會影相記錄旅程，不過覺得依家啲人影相態度太隨便，唔係咁好，事關過去用菲林嘅年代，因為菲林同沖曬都要錢，所以大家好重視每一張相，按快門前都會諗清楚。依家數碼化年代，影咗可以刪除儲存空間，於是個個就求其係咁影。佢就只會重點影，通常出席一個活動只影六、七張，所以每一張都咁重要喎。
香港內蒙古社團總會會長海峰嶺（大海）同太太高燕都喺度，大海講起Eddy本相集好有感覺，事關本書收錄嘅相片以內蒙古同烏克蘭最多，而呢兩個地方就係佢親自陪住Eddy去嘅，形容自己見證呢本相集誕生添！
卓妮