百貨公司正減價促銷，小明同小強都係呢間公司售貨員，小明正大聲叫賣：「全場貨品大減價，買兩件以上有額外折扣！」
小強：「小明，你嗌到咁聲嘶力竭，小心會整傷聲帶呀！」
小明回答：「經過呢幾日，都覺得把聲變得有啲沙同低沉，點算？」
小強：「唔使緊張！等我先講吓導致聲沙嘅原因畀你知啦。除咗一般傷風感冒、聲帶發炎和上呼吸道感染原因外，過度用聲，好似大叫、哭泣同長時間講嘢都會傷到聲帶。另外，用錯聲線，例如講嘢太快太用力，音調過高或過低都會好易令聲音沙啞。仲有，講話姿勢唔好亦都有影響呀，側起頭講嘢，同埋講嘢呼吸唔協調，都會加重聲帶嘅負擔。」
小明問：「知道咗成因，又可以點樣去保護自己嘅聲線呢？」
小強：「可以從講嘢習慣同生活習慣着手。好似我哋喺嘈雜嘅環境叫賣，如果能用合適嘅擴音器材，就可以避免聲帶過勞啦。仲有唔好長時間講嘢或者講電話，畀聲帶有足夠休息，好似你依家聲沙，就應該畀把聲多休息啦。另外，講嘢嘅節奏、音量同音調都要適當控制，日常多飲水滋潤喉嚨，少食刺激性食品，過酸、太鹹或者太甜嘅食物都適可而止呀。」
小明回應說：「咁我明白喇，麻煩小強你睇住個檔位先，我要畀把聲休息一陣，飲啖水先，拎番啲擴音器材出嚟，再一齊努力啦！」
職業安全健康局
www.oshc.org.hk