「藍廢紙、黃鋁罐、啡膠樽」口號講咗N咁多年，香港唔單止做唔好源頭減廢，反而垃圾愈嚟愈多，鬧市固然滿布衞生黑點，連平日人影都唔多隻嘅海灣都變埋垃圾崗。冇計喇，港府出名冇心冇肺冇靈魂，旨意垃圾官僚處理垃圾問題，香港想唔變臭港都幾難！
環保署舊年更新優先處理海上垃圾黑點，結果垃圾黑點不減反增，由廿七個增至廿九個，記者去當中嘅石澳垃圾灣睇過，發覺該處果然冇改錯名，垃圾仲多過魚，成個灘堆滿發泡膠、膠樽、釣魚用具同食物包裝，見到都反胃。至於同樣臭名遠播嘅屯門龍鼓灘，啲沙地係黑色（口架），水面仲滿布油污。最騎呢嘅係，雖然龍鼓灘被評為海上垃圾黑點，但居然被環保署評為「二級滿意」，你話班官老爺係咪精神錯亂吖！
講開又講，石澳垃圾灣長期榜上有名，當局一直闊佬懶理，關人個關，從冇派人清走啲垃圾，如果唔係有義工自發去執手尾，以香港每年產生超過一萬五千噸海上垃圾計算，睇怕香港一早淪為垃圾港。最離譜嘅係，有熱心市民已經將垃圾紮好一袋袋，點知官老爺連派人執走垃圾袋都懶。懶人見得多，好似港產官僚咁嘅極品真係世間少見。
真係諗極唔明，海洋垃圾問題困擾香港多年，連CNN都曾經以「垃圾港」形容香港嘅港灣。早排網上瘋傳一段短片，片中懷疑食環署外判清潔工將成袋垃圾掟落海，真係見到都得人驚。當然喇，清潔海港，官民有責，有南區區議員反映，好多海上垃圾其實來自水上食肆、魚市場同漁船，淨係香港仔避風塘，閒閒哋一次過可以清走十幾噸垃圾，面對部分缺德嘅市民，政府除咗宣傳教育，最重要仲係加強執法，咁至有阻嚇作用。
不過嘥氣喇，港產官僚最叻就係卸膊同扯皮，多一事不如少一事，你都幾難點得到佢哋做嘢。家陣海面垃圾係由海事處負責，漂到上陸地就由食環署、漁護署同康文署處理，名副其實「各家自掃門前雪」。港官你推我讓，賴得就賴，唔到你唔服。就講之前灣仔一條私家巷有架廢棄電單車咁吖，竟然可以三年原封不動冇人理，警方、食環署、地政總署收到投訴後一味推莊，連「冇引擎嘅車唔算車」嘅藉口都噏得出，官老爺淨係將責任當波咁踢，但就唔識將垃圾大腳清，真係唔得佢哋死。
都係嗰句喇，港產官僚領取全球數一數二嘅高薪，大事做唔到，垃圾清唔掂，環保政策又天殘地缺，本身就係最昂貴嘅垃圾，應該快快送去堆填，免得市民眼冤。