政情：太太買多個車位 徐英偉好支持
政治委任官員及行政會議成員尋日更新周年個人利益申報，其中，勞工及福利局副局徐英偉（Caspar）就喺上星期申報，太太買多一個深水埗車位作自用，即係太太依家總共有兩個車位。Caspar回覆查詢時笑指，包括買車位在內嘅屋企所有嘢，全部都係太太主導，會支持太太嘅決定，而屋企依家有一部車，香港地冇多個車位，都唔會去諗係咪需要多部車喎！咦？唔通佢屋企想買多部車？
民政事務局副局長陳積志雖然並無申報持有物業，但就申報同太太共同擁有一間在港註冊，叫「新金豐發展有限公司」嘅私人有限公司作投資持有用途。唔知打算做物業投資定證券投資呢？
馮興禮「預先」申報結婚
至於勞工及福利局局長政治助理馮興禮（Henry）就喺七月一日申報有個做事務律師嘅太太，不過佢係七月十二日先喺英國結婚喎，唔通預早申報咁穩陣？Henry就話，佢其實六月中已經同太太喺香港簽咗紙結婚啦，如果未簽紙，英國嗰邊唔肯搞婚禮儀式o架！