政情：港深創科園 翻兜前高官任CEO
特區政府鬧人才荒，不斷搵舊將攝位做公職或公營機構，已經並非新鮮事。政府啱啱先公布委任公務員事務局前局長張雲正做保險業監管局行政總監，估唔到事隔幾日，港深創新及科技園有限公司（港深創科園公司）尋日就宣布翻兜已退休嘅發展局前副秘書長陳志明做行政總裁，真係唔話香港人才不足都唔得啦！
座落於落馬洲河套區嘅「港深創新及科技園」，係由科技園公司嘅子公司港深創科園公司，全面統籌上蓋建設及營運等工作，而港深創新及科技園攞到前期工程撥款冇幾耐，希望二○二一年前，可以提供首塊可供發展嘅土地。
政府又鬧人才荒
陳志明以往曾經擔任過嘅職位，包括唔少政府工務部門嘅管理層，例如土木工程拓展署副署長以及發展局副秘書長（工務）。創科局常任秘書長暨港深創科園公司主席卓永興就話，陳有豐富管理及建築工程監督經驗，加上熟悉政府行政，相信對港深創科園嘅早期發展有重要貢獻咁話。
咁睇落都係因為港深創科園初期主要有好多硬件基建工程有關，政府又鬧人才荒，所以要翻兜陳志明啦！