政情：重回母校 盧偉國自嘲白頭宮女
立法會議員盧偉國早前同細佬重返母校出席畢業典禮，佢就大嘆好似白頭宮女話當年。事關當日佢負責頒授畢業證書同致詞，而五十三年前佢畢業時，就係代表畢業生致詞，今日重回舊地再上台演講，難怪佢會話係好奇妙嘅體驗喇。
同細佬課室話當年
盧同細佬兩人更齊齊喺課室入面影相，相信佢哋大把回憶可以慢慢講。盧慨嘆校園變化好大，因為已經見唔到當年嘅課室同操場，但係校舍向高空發展，設施變得更完善。不過佢就好好記性，話學校嘅教堂、校歌、校徽同校訓依然無變，當日更同學生齊齊唱校歌添！睇嚟佢當年好認真返學，先會過咗半世紀仍然記得母校一事一物。