中環出更：議員請助理 范國威最缺人
暑假係應屆畢業生求職季節，適逢多名立法會議員最近都請議員助理，究竟邊位議員出手最闊綽？根據勞工處網站顯示，立法會議員范國威（Gary）、胡志偉、許智峯（峯鴿）同葛珮帆（EQ）都請緊議助，其中三人都要求議助每周返工五天半，而當中以EQ較闊綽，開價月薪一萬二千至一萬八千元，較其他議員嘅一萬至一萬三千元高。
四名議員要求嘅議助資歷各有不同，主要都係處理地區工作同跟進個案，但峯鴿就列明具私人樓宇法團運作知識會優先考慮。而Gary應該就最等人用喇，事關佢請四名議助，佢解釋話因為大圍隆亨邨嘅辦事處將投入服務，而將軍澳嘅辦事處咁啱兼職員工同實習生都離開，所以空缺較多。當佢獲悉多名議員都請人時，第一個反應係「咁多人請人咩？弊喇！」似乎擔心唔夠人爭。
峯鴿呻難請人
峯鴿就解釋，佢服務嘅中西區多私樓，希望議助同居民開會時有相關知識。佢都認為請議助好難，見工嘅人比預期少，可能因為外界對行業觀感唔好，冇咩晉升階梯喎。佢又話，如果政府肯將資助議員嘅辦事處租金津貼同議助薪金津貼分開，議員請人就可以闊綽啲喇。
卓妮