政情：袁嘉蔚跑步着長褲 免得「失控」
大熱天時跑步都咪話唔辛苦，話說香港眾志常委羅冠聰嘅女朋友袁嘉蔚（Tiffany）於Facebook貼文，提及自己同幾名同事及實習生，喺香港仔海濱一帶跑步，着住黑色運動長褲跑步嘅Tiffany話，連實習生見到都覺得熱，Tiffany其後解釋着長褲係因為驚會「失控」，不過唔好諗錯隔籬，Tiffany係話驚隻腳啲肉冇嘢約束會失控，認真搞笑。
Tiffany話，平時坐喺辦事處做嘢做得耐，得閒做運動可以舒展吓筋骨，為咗令到身體嘅脂肪唔好失控地周圍走，所以平日都會跑吓步，而佢多數都係夜跑，莫非佢怕日頭跑會曬黑？
組夜跑團 冀街坊齊運動
近來專注地區工作嘅Tiffany又話，自己跑步時經常見到唔少街坊，特別係後生仔喺區內跑步，所以都開始「約跑」，希望透過組織夜跑團，吸引多啲街坊做運動喎。