政情：扶委會新丁葉文斌 唔識分機密
扶貧委員會（扶委會）今個月換屆，大批年輕新血成為新成員，屯門區議員葉文斌就係其中一人。佢直言對於獲委任感到有壓力，仲自爆唔識分咩叫機密喎。聽佢咁講，會唔會唔覺意洩露政府機密o架？
葉文斌話一向都有加入唔同地區委員會，起初以為扶委會同嗰啲委員會性質相若，但同前扶委會成員、立法會議員梁志祥討論同翻查資料後，先發覺規格並不相同。
而佢亦係首次面對機密原則，直言一定會保密，但就要先花啲時間去分辨何謂機密。為免唔覺意漏口風，佢仲呼籲其他人唔好問佢機密資料，睇嚟佢都幾緊張喇。
關注房屋在職貧窮問題
佢又認為扶貧與房屋係分唔開，因為唔少人面對沉重嘅房屋成本。佢又以自己為例，話現時嘅租金都佔咗佢議員薪金三分一以上，所以加入扶委會後，重點都會放喺房屋同在職貧窮問題上喎。