政情：人仔貶值帶動商機 黃進達睇好「一程多站」
近期人民幣進入新一輪貶值周期，仲愈貶愈有，港人返內地消費慳番唔少。香港旅遊業議會主席黃進達（Jason）話，人仔貶值可帶動海外遊客嚟香港後再北上旅遊嘅「一程多站」商機。
佢話，海外遊客特別係來自東南亞國家一向對匯水好敏感，好多人想去內地旅遊，但會礙於匯水高企而卻步，依家人仔貶值就多咗誘因吸引佢哋去，遲啲高鐵通車亦會吸引遊客經香港去內地玩，所以有利於業界開拓市場。
暑假帶旅遊業界內地考察
講開旅遊，暑假係好多人舉家外遊嘅旺季，但係Jason今個暑假就冇得去玩，因為要帶旅遊業界到內地考察，開發新旅遊商機，所以要等到年底先至帶到三歲嘅囝囝去旅行喇。佢又話，每次帶個仔去旅行，都見到佢有成長及進步，包括講嘢多咗、精靈啲，所以佢經常鼓勵家長要多啲帶小朋友出外旅行。