中環出更：黃偉綸失言捱轟 休假避風頭
發展局局長黃偉綸上周出席書展活動，引述咗日本小說作家東野圭吾「警察都唔一定個個係好人」嘅言論，引起香港警察隊員佐級協會不滿，黃事後解畫並非有意冒犯警隊，事有巧合，黃於今日起休假，直至八月中才復工，期間由發展局副局長廖振新兼任局長職務，唔通黃自知失言搞到一鑊粥，所以休假避風頭？
團體抗議批有辱警之嫌
政府尋日刊憲，公布黃偉綸今日開始休假，直至下月十五日復工，換言之抖足超過半個月時間。話時話，雖然黃已經去信警察隊員佐級協會解畫，但係咪就咁可以平息呢場風波，就要睇吓後續發展，事關親建制團體「珍惜群組」率先狙擊黃，尋日一行十多人到政府總部示威，批評黃涉及警察嘅言論，有侮辱警察之嫌，加上事後無作出道歉，嚴重打擊警隊士氣，團體代表向發展局及保安局代表遞交請願信之後和平離開。
此外，教育局局長楊潤雄亦會喺本月三十日開始休假，直至八月十三日復工，而於楊潤雄休假期間，教育局副局長蔡若蓮會兼任局長一職。
卓妮