中環出更：為台灣義工感動羅台秦眼濕濕
台灣嘅垃圾回收及環保工作一向行得快過香港，仁愛堂董事局早前組團一行四十幾人去台灣訪問，由本身係台灣人嘅主席羅台秦（Louisa）帶隊。眾人參觀一個慈善機構嘅環保回收站之後都話好感動，不過就唔係因為佢哋努力拯救地球，而係因為好多不辭勞苦為膠樽及紙張進行分類處理嘅義工，佢哋都係年邁長者、智障人士或抑鬱症患者。難怪Louisa參觀時都忍唔住眼濕濕啦。
Louisa話，參觀回收站係今次旅程嘅重點，見到啲義工既專注又開心，令佢覺得呢度更加似心靈療愈站。佢有感而發話，香港嘅慈善機構太商業化，一味以催谷籌款數字為主，社會服務範疇亦比較少關注心靈患者，其實給予有需要人士心靈上嘅關心係比給予金錢更加重要。今次嘅訪問亦為仁愛堂「綠在屯門」及「精神健康」計劃帶嚟新嘅啟發。
饒亮賢喺當地過生日
總理黃紅曉亦帶埋囡囡Venus一齊去台灣，仲話覺得今次得益好大，見到回收站有位義工婆婆年近九十歲，仲日日風雨不改去幫手，婆婆個仔更特登請個工人接送婆婆去做義工，令佢好感動，囡囡亦學到好多嘢咁話。
一場嚟到台灣，又點少得享受美食。今次都有隨團嘅總理王茂林同太太就去咗宜蘭著名特色餐廳玻璃屋享用午膳，兩人大讚又平又好味。王太笑稱，開車去餐廳要近半小時，原本仲呻話做乜咁辛苦去食餐飯，去到先知值回票價，對宜蘭嘅大自然景色亦十分難忘。同樣感到難忘嘅仲有總理饒亮賢，事關行程其中一日適逢佢牛一，眾人喺溫泉酒店舉行溫馨生日派對，為壽星公留下美好回憶。
卓妮