早前有政府停車場出現大排長龍輪候買車位月票，有市民鬧爆運輸署有晒資料，點解喺呢個年代唔可以上網申請呢？排長龍何止月票吖，仲有居屋，事關居屋爭崩頭，房委會每次出新一期居屋，市民攞表同交表都大排長龍，房屋署署長應耀康尋日喺房委會會議上就話正研究為居屋出售引入網上申請，預計要喺出年嘅新居屋採用。呢個政府認真後知後覺兼僵化，咁擾民嘅嘢一直都唔改，認真大落後，仲話要做電子政府喎，睇怕仲有排追呀！
