政情：建制「小花」好落力 謀選區會踢走涂謹申
二○一五年區議會選舉時，民協深水埗區議員馮檢基（阿基）被工聯會「小花」陳穎欣「挑基」，終將阿基踢離老巢敗選。明年區議會換屆選舉，疑出現阿基「翻版」。事關喺社交網站開設專頁「奧運谷」、自稱「奧運谷谷主」嘅伍嘉敏（Carmen）就喺區內掛晒橫額、直幡，仲不時喺區內派發單張，戰鬥力十足。如果佢挑戰身兼油尖旺區議會奧運區議員嘅立法會議員涂謹申（阿涂），真係唔知阿涂命運如何喇！
不時喺「奧運谷」發貼
Carmen不時喺「奧運谷」發貼，唔只上載自己嘅靚相「呃like」，亦不時分享區內資訊，包括區內商場舉行環保交換日，同提醒街坊落雨出門要帶遮，與唔少區議員嘅社交網站無異。
母親節喺區內派香皂花
而今年母親節，Carmen仲喺專頁分享佢喺區內派發香皂花嘅照片，分分鐘勤力過啲區議員，唔怪得被質疑係建制派派出對付阿涂嘅「小花」喇。
阿涂喺二○一五年嘅區議會選舉都受到建制派挑戰，睇嚟佢如果想繼續做有「超級議員」之稱嘅「雙料」議員，都要嚴陣以待至得。