政情：高鐵工程問題多 張炳良不斷不斷拆彈救火

二○一二年出任運房局局長嘅張炳良去年卸任，至今超過一年。佢尋日喺一個電台節目度話，當年佢仲未上任局長時，原本希望只係負責房屋範疇嘅工作，點知後來該局改組唔成功。而佢出任局長初期，都係花較多嘅時間喺房屋範疇方面，但到二○一三年出現咗高鐵工程延誤同超支問題之後，佢就將愈嚟愈多嘅時間花喺交通範疇嘅工作上，仲不斷要拆彈同救火添！

指社會對問責制睇法單純

張炳良又講到，二○○二年推出高官問責制，可能當時太強調「問責」，令到社會對問責制嘅睇法比較單純，認為一有事故發生，就要官員「人頭落地」。不過佢就認為呢個係好消極嘅諗法，因為問題可能係結構性嘅。佢又話香港政制發展停滯不前，令到行政機關嘅認受性好脆弱，未能取得社會信任，政府喺議會又冇票，令到政府推動政策時都舉步維艱。張炳良依家都已跳出政府呢個熱廚房，可以話係一身輕喇！

稱設監督鐵路部門亦難解決

對於近日高鐵及沙中線嘅工程連環爆鑊，張炳良就話有關港鐵沙中線工程嘅問題，目前大家掌握嘅資料好零碎，事件令人感覺混亂，但係咪涉及行內問題、承建商監督問題，定係港鐵管理問題，仍然有待政府成立嘅獨立委員會調查。被問到係咪要成立專門監督鐵路項目嘅部門，佢就話目前鐵路安全、建造同營運分別由機電工程署、路政署同運輸署負責，如果另立部門，就要將分散於不同部門嘅職能集合，但咁樣亦都係無法解決政府委託港鐵建造鐵路項目問題嘅。

佢又提到當年高鐵超支，話高鐵工程項目係喺二○一○年初、即佢未上任時立項，當時正值金融海嘯之後，政府可能因此低估咗造價，但後來項目成本愈來愈高，如果規劃唔周詳，就會令承建商有機會申索，令造價有變。佢咁講，唔知係咪想撇清自己嘅責任，為自己開脫呢？